Baba Kaja danaske ruši bor

OTOČAC – Vrnula se naša baba Kaja s maše na Sveta tri kralja. Borami je donesla celu Coca-colu svićene vode, nu od pol litre. Tila zet dvolitru, ma daj baba budi pametna, ispuljaćeš popu svu svićenu vodu iz kablice, a i drugi narod se more ljutit. Ta ni sva svićena voda tebi naminjena – velimo joj mi. Edva edvice  pristala na pol litre.

I tako čakamo babu dok se ni vrnula iz maše, srknušmo juvu,  južinamo mi, kad baba u frižider i iznese pladnjenku  pečenke od Božića. Nešto se svi kaj okrićemo, da stara pečenka, da to ni neg macanima dat. - Macanima?! Pečenku!? – križa se baba Kaja. – Pa ki vidil pečenku bacat, Bog vas ubil? – spovidala se i pričestila pa valjda sadaj more kljet ispočetka. – Ist pečenku! – Ali baba, konda se nekako priminila, konda posivila ... – provamo mi babu udobrovoljit. – Ma ča prominila, ča posivila! Vidi kako je u sredini još lipa roskasta. Dok ne pozeleni, dobra je za ist. A i kad pozeleni, baci se u vodu prokuvat i poi se – ne da se baba. ... Pečenku bacat ??? I red nami ist tu staru pečenčinu, namilje se u ustiman, ali ča moreš. Nekako svi se s preše naili, kaj da su siti, gljeda baba ispod oka i miri nas za stolon pa veli: - Ovo ča se ni za južinu poilo, išće se za vičeru s policami. Čaš sadaj majke ti Janje? Ako ki u bolnici od nas završi, rećemo da je gripa, il ta korona il magareći kašalj, da sramota bude manja.

Kase baba raspravila i skinula crkvenu robu, pa povezala svoj rubac i pripasala zaslon, ćapila se bora. Baba Kaja ruši bor. – O, baba, ča se ti natatalila na bor, a? – Kako ča, kad niki drugi ne će, red je meni, staromu čeljadetu, danaske je vrime kadaj se ruši bor. Sa Sveta tri kralja završiva božićno vrime, a bor se kiti za božićno vrime. Prošlo božićno vrime pa ne treba ni bora. El tako il ni, a? – Ma je, pravo ti veliš, nego znaš ... pop veli da ne bi trebalo bor rušit na Sveta tri kralja već kaj dan kašnje, el. – Kaj dan kašnje, el? Konda san ja munjena, konda ja ne znan nač ti ciljaš. U voj se kući nigda nisu slavila dva Božića, pa se ne će ni slavit dok je moga rupca na glavi. A kadaj mene vratar odnese, delajte ča oćete. ... Da njemu pop rekal! Ča mene briga ča taj tvoj pop veli, pok je svita i vika bor se kitil uveče na Badnjak i rušil na Sveta tri kralja. – A esi li vidila da pop drži bore u crikvi u gradu sve dok Fajbanova mine. – I? – Pa kad pop more, ča ne bi mi? – Do Fajbanove!?! – križa se una livon rukon. - E mi ne moremo čekat Fajbanovu s boron, bor danaske prše preko ganka u dvorišće, a ča se crikve i bora tiče neka ga držidu lipo akojdu do Uskrsa. I samo da ti rečen, negda se bor u crikvi znal držat sve do Svićnice. Eto, tako, da ti ja kažen. ... Un i pop ćedu meni nešto divanit, baleše de baleše.

Čepuša baba bor kaj lovac pile, skida ne bunbice z bora kaj manita i meće ji u škatulu za dogodine, a kad ga je fort očupala, zede ga i puna sebe odnese i ofrknu preko ganka. Baba Kaja završi – božićno vrime. Na Sveta tri kralja.

I.B.