Zgode i nezgode babe Cuke s popon kad je išal po biru

OTOČAC – Još zerkicu pa će valjda završit i blagoslov kuć. Je da ima popov, razletili se na sve strane, al ima toga, sve raštrkano pa ti leti od kuće do kuće ošli kadi koga nać. I još k tome novi popi, ne poznedu narod, ne znadu ki naš a ki njev, ki popa prima, a ki ne. Ni ni njimi lako, ma kakov.

Aj, fala ti Bože budi, kod nas je pop prošal, je da je krenul napak, od kraja prema početku, al prošal je. Baba Cuka sadaj more sidit na svojoj škrinjici od drv i grijat ruke na plevu. I tako brndamo mi, da ni u nami, a divana – bolje da ga niki ne čuje, nema ni ča čut. Došli mi jopet nato kako su negda popi išli po biru. A baba Cuka zna kadi je vrag svoja kola satrl, da ne bi znala kako je to negda bilo pa veli:

-To ti je oduvik tako nekako bilo, kad bi pop išal po kućami, muški su vajk gljedali kako da se isfuknedu, da popa ne dočekadu. Unda ji naedanput napane da moradu u štalu k blagu, da moradu prtinu naprvit  do stogov u kotarini, da moradu drv nacipat, a nigda nisu cipali, bil je to ženski posal. Samo da šmucnedu kroz vrata van, a unda ga neš vidit dok pop ne mine.

-Pa ki je unda popa čekal? – pitamo mi. – A kako kadi, najčešće ded, ako ni umrl, ako je umrl unda baba, išlo to po starini, većinon žene i dica su popa čekali. Tako to bilo, borami je. – Pa el pop znal pitat kadi je muškina? – Ma je, je, a mi se grišli i laži, isporavljaj ji, kaj morali su nekudaj. Eto ti naše božićne spovidi i pričesti, već pane na blagoslovu.

-Evo moj Mika, Bog mu dal duši lako, un bi vajk utekal da popa ne dočeka. I tako edne godine, a bila ljuta zima, ma znaš da su od čvike uši otpadale, u zadnji čas un šmucnu pa kuće, kuće pa u konobu, ni dospil u štalu kadi je teplo. Blagoslivlje pop, molimo, škropimo se svićenon vodon, ja na ževarku bacila i mrvinju tamljana, sva kuća i oko kuće miriši, mežnjar napsilal kregon na vrati G + M + B i godinu, dala ja i bir u vriću mežnjaru, al ne će pop ća. Pa divan o vome, pa divan o nome, pita pop svašta,konda ga sam vratar tenta. Ne će iz kuće. Nudimo ga rakijon, prevnu edan žmulj, otrese se, nudimo još, da ne će, da će se napit. I sidi i dalje pripovitke razvija. Red ga nudit i ilon, u našoj kući ni pop nigda il, al čaš, kuval se mrs, krunpir kipi po plevu, miriši zelje. Da ne će ist. Koš ko neš, zate južinu i nako Kata sprema. I tako nami nestalo i divana, sidimo i mučimo, pop lopov. – Kad? – sve gorimo od želje da čujemo ča će dalje bit. – Kad naedanput  moj Mika, biće da je ozebal u konobi i bog  njegov, tuče držalicon motike u daske ozdola i pita: - Cuko, Cuko, el taj vrag šal ća? Ja propadan od špota u crnu zemlju, zemljo otovri se!, pop se uvatil smijat konda mu vrag zube čupa pa veli iz svega grla, valjda da ga moj Mika more čut: - Saću, Miko, saću! I kako to reče, điknu se i ode dalje po blagoslovu.

-A ded Mika umire od sramote, a? – Ejh, kad bi taj umiral za svaku malicu, umrl bi un odavno, vako je doživil osamdeset i ku, da ga konj ni opatrnul zadnjon nogon u prsa bi uvatil i stotu. ... Unda edne godine, da ti kažen ča se meni dogodilo. Pop već kod Marije, naše konšije, eto ga u kuću, a ja jadna nisan odnesla naćve na pod. Ja s naćvami na pod i vrže ji više škal i trk niz škale, zape mi coklja, potrknu se na zadnjoj škali i bub natla, a pop prekoračuje prag, prvo na me. Znaš da me je i prekoraknul. I veli, vrag u njemu velil: - El se to neki sakire od popa, a? – Ma ne, gospodine, vajk smo popu vikali gospodine, ja nešto još imala posla pa se potrkla, pa pala, pa ... ča se ja više oću ispravičat, to gore. Srićon un poče: - Mir kući voj ... Ne samo da san se osramotila, već san i koleno ubila, bolilo me celo proliće. Za to sve pop kriv. ... Pa unda kad je Stipa šal na pod, a Mata se napravil da je un pop i da gre po blagoslovu  ... imala bi baba Cuka pripovidak o popu i blagoslovu, al nemamo više vrimena.

Pa se mi mislimo el i danaske ima ki ki se sakire od popa kad gre po blagoslovu? Morda i ima, morda nema, ma biće da ima. Il nema ...

I.B.