Sveta Kata i njezin snig i pir

OTOČAC – Danaske je sveta Kata, a naša baba Jevica veli: - Sveta Kata, snig na vrata. Veli baba Jevica, al sveta Kata ni mogla dodurat, pa je snig borme zaprljil i kaj daj ranije. A to je takovo vrime, ne more zima vajk čekat na svetu Katu, zimi dojde kaj za rodit, pa ni čekanja, a sveta Kata vajk na isti datun, pa ajd ti to sadaj uštimaj. I unda se zima predomislila i danaske na svetu Katu oteplilo, odjužilo, ma bi reć teplo, al neka, neka, veli baba Jevica da će nan zima dat po repu. I Kad ja pitan babu kako će nan dat po repu kad nemamo repa, a ona samo ucnu i reče „m!“ i to je bilo sve. Ne da se baba munjenon gradit.  

Unda naša baba Jevica, puna mudrolij kaj šipak bobic, veli da sveta Kata zatvara i pirovska vrata. E kakova su to vrata da nan je znat? Jopet una sivlje očima i konda divani „o munjenoga li voga mlajega svita!“, pa nan tumači da ki je piroval do svete Kate piroval je, a ocad da više nema, čekaj! – Baba, kako čekaj? – Lipo čekaj da projde božićno vrime pa piruj. – Ali, baba, ako je mladoj priprlo, kako una more čekat toliko? Ne more! I unda baba ofrknu coklju, na coklja pogodi televizor, dignu se oblak prašine, žena na me da ću ja sadaj trt prašinu od babine cokljurine, da una ne će, da je noj dost bit dikla u voj kući, i nasta celo zlo od babe Jevice i svete Kate, Bože na prosti.

I na kraju da mi čestitamo svim Kȁtami, Kãtami, Kȁjami, Kãjami, Kaȉcami, Kȁjkami, Kȃjčami, Kȁticami, morda i koj Katarĩni njevo godovno, ča bi rekla naša baba Jevica, a to joj dojde kaj imendan, el.

I.B.