Babe Kaje stidnica i - javnica

OTOČAC – Namo pada Venecuela, namo Grenland samo ča Tramp ni ćapil, namo Rusi rušidu Ukrajinu, u Iranu se veliki vrag spera, a u Rvackoj bi reć da teče med i mliko, da nikakovi problemov nema i da je Rvacka na Misecu. A njoj je najveći problem vi dani, da prostite – stidnica. Po televizoru i po portalin se perača o incijativi Višnje Ljubičić, pravobraniteljice za ravnopravnost spolov, kako treba ukinut – stidnicu. Nismo se mogli dovrć ča o tomu mislit pa smo priupitali babu Kaju da nan una reče.

- Baba? – Ča? – Esi ti čula da se divani da treba ukinut stidnicu? – Stidnicu!?! A ča ti je to? – Valjda nigda nisi čula ni vidila? - Borami nisan, prvi put. – O, baba, sve mu vratar ne će, a kako unda ti zoveš nu stvar? – Ku stvar? – Pa ... pa nu stvar ... znaš valjda ča je „na stvar“. – Aaaaa, ti misliš na narav. – Ma e. – Eto, rekla san ti, narav. – El se još kako tomu divanilo, a? – Da, da, ima na stvar puno imen, osobito je edno na glasu, svi ga znadu, često puti ki koga tamo i pošalje, al me sramota reć pa ne ću. – Da tebe sramota!? Baba!!! ... More se reć ... more se reć, na primer – manda, pa pipica, pa ćućica, kokica, more se i minđa, neki reče i muf, kako ki. – Unda ti nisi nigda čula za stidnicu? – Prvi glas! A zač ti ti mene izuminjuješ za tu stidnicu, za taj špot i sramotu?

-Vidi vako, veli ta nekva Višnja Ljubičić da ste vi ženske neravnopravne i kase reče stidnica, da se vami namiće stid, oće reć sram. To su kaj sramne stvari, el. – E. – I unda da bi vi ženske bile ravnopravne s muškinon da se to mora maknut ća i da se ocada stidnica ne smi zvat stidnica ... – Tako ta pesta veli? – Aha. - Pa kako more na muška i na ženska stvar bit ravnopravne, nikako ne moredu! To ti je kaj ključ i lokot, čajti ključ ako ni lokota, čajti lokot ako ni ključa? ... Znaš ča, unda ti njoj lipo poruči nek je nazove, el tu žensku stvar, nek je nazove – javnica. Pa će joj unda srce valja bit na mestu i valjda će ženska bit zadovoljna.

I ča reć? Baba nas zatekla sa svoin odgovoron. I to radikalnin! Ne bilo kakovin. Jerbo, misli baba Kaja, da ča more više ženske emancipirat nego da ocada stidnicu nazovedu javnicon. Javnije ne more pa da oš.
I.B.