Fort se uprolićilo

OTOČAC – Ča bi rekla naša baba Janjica, evo se fort uprolićilo. Konda zime ni ni bilo, konda je gotova. A Bog zna eli il će nan još dat po repu. Jerbo ne veli se badave da i bradati sveci moradu otrest svoje brade. A ki su to sveci? Pa sveti Grgo (koga je Crikva frknula iz kalendara, a vajk je padal na 12. ožujka) i sveti Josip (snigon posip). Al se računa da ako ča od toga i bude da će bit ukraće i umanje. Pa jopet Blagovisti i Pripovisti i trojega mesa ...

Ako je pitat prirodu, una veli da je proliće tote. Eno leske pušćale rese, ma pedalj dugačke, sve se žuti. Pa jopet procvetali pivčići, neki ji zovedu jaglika, a neki jaglaci, kako ki, neki fino i školovano, a neki seljački. Tote su i visibabe (visidede nismo još vidili, moraće reagirat pravobraniteljica za ravnopravnost muški i ženski, to je na ka se godinu dan rvala sa stidnicon i brala na stidnicu visoku plaću, da nan oprosti vaš lik i obraz). Nismo vidili fijolic, al rupićedu i une. Ojdu, ojdu.

I.B.