Mačkari i u plovaniji

OTOČAC – Vrime je od mačkarov, nema još dugo pa evo i Čiste srede. A unda je mačkarami kraj jerbo nastupa korizma. Tako je vajk bilo, a valjda će tako i bit. Zato treba vrime iskoristit dok se još more.

Nisu negda samo dičurina išla u mačkare, ma kakov! Išli su staji, borme išli. Lipo se u ednoj kući skupi, tamo se umačkaraj i po selu, ovaj gradu. Je da su gracka gospoda imala maskenbale i tako to, al jopet jin ni bilo mrsko primiti i obične mačkare.

Većinon je narod pušćal mačkare u kuću, bilo bi to sramota i špot ne pušćat ji pa da se dospije narodu na jezik. A unda se mačkarami mora ča i dat, obično su se davala jaja, ne jaje-dva kaj dičjin mačkarami, van nasad jaj. Pa jopet brus slanine, morda i ko suvo lebro, kak je ki mogal i imal.

Mora se reć da su se popi odvajkad ravali s mačkarami. Prodikali su uni s prodikalnic protiv mačkarov, da to ni kršćanski, da je to grij, al ča ti narodu moreš suskratit.  Zato su ode kod nas mačkari mogli ić uveče na Fabijanovu, a dotljen su popi morali smirit blagoslov kuć.  Jerbo pop i mačkari se nisu smili i nisu mogli sritit.

Al vrimena su se prominila, sve je manje naroda pa je sve manje i mačkarov. A i mladi svit gotovo da i ne zna ča su mačkari i kako se gre u mačkare. To još znadu vi ki su na pragu „zlatni godin“, pa dok ji još zdravlje služi eto da pokažedu i da se taj običaj ne utrne.

Skupila se edna ekipica iz grada i vi dani pošla u mačakre. Kako su išli, nisu mogli promašit ni plovaniju u Otošcu. Najprvo su zasvirili pred crikvon pa ča bude, ako ji pop primi – primi, ako ne, poćedu dalje. I pop ih je lipo primil, upeljal i u plovaniju, nako kaj svoje. Bi reć da nekvi novi vetri pušedu i u Crikvi.

I.B.