Ognjeni su dani

OTOČAC -  Vrime je Ilijinje, neki veli i Ilinje, kako ki, vrime je od ognjeni dani, a sve počimlje sa svetin Ilijon, pa unda nastavlja sa svetin Danijelon i na kraju zavinta Marijon Ognjenon. To je u godini kod nas u Gackoj najvruće vrime, je i Petrova tepla, al ni nigda kaj Ilijinja. Oće ti duša van.

A stari je narod rekal da žito do Ilijinje mora „il sazorit il izgorit“. Nema mu druge. Ve godine je uteklo prije Ilinje, kaj nigda ima naroda kaj je već i zob pobral, da ne bi šenicu. Zob se negda žela tekar u kolovozu, tamo do Velike Gospe. A ve godine je izgorila. To se vidi i po slami, bela konda je obelilo. Takova – kakova. Sve žito u anbarima, pod krovon pa ne more nikakova tršatuna žitu naškodit. Borami je tako.

E sadaj, u tima ognjenin danima se ni smilo seno spravljat, a pogotovu zdivat, ma kakov! Bi man grum u stožinu rnul i zapalil. Ni se smilo seno svažat ni u pojatu, u šajer, već kako ki veli, bi i tamo zapalilo, borami bi. Sadaj tote ne priti nikakva opasnost, sve spravno, sve u rolami i balami, gotovo. Morda još kadi ka bara ostala, a kako nema marve, ne treba ni sena. Van za prodat kadi doli u Dalmaciju, velidu da tamo sve izgorilo pa da nemadu.

I tako se sveti Ilija i ognjeni dani moredu s miron dočekat. Borami je tako.

I.B.