Zvone zvona svetoga Ilije...

SINAC – Došal u Sinac fra Mirko, nikako se Sinčerani naviknut na taj „fra“, njima je pop uvik pop ma kakovu kiklju na se obukal. Ode kod nas u Gackoj ni bilo ti fratrov (sadaj imamo dva, edan u Sincu, a drugi u Konpolju) pa narod veli „pope“, „gospodine“ il „plovane“. I ne treba mu zet za grij, to nikako.

I fra Mirko se eto for udomaćil u Sincu. A bilo ga je svudaj, obranal je taj pol svita, Amerika, Njemačka, Australija, ma ki zna kadi ni bil. I svašta vidil. Svicki čovik. I, eto prispil i u Sinac i veli da mu je lipo, da je narod pitom. Kaj svaki drugi, ni gori ni bolji. Nakov je kakov je. Jerbo fra Mirko je Bodul, iz otoka, ni divan isti al je jako sličan, čakavski tamo, čakavski vamo i man se ljudi lakše razumidu.

A u plovaniji i crikvi posla koliko oš. Na crikvi svetoga Ilije bila zaštekala zvona, nejdu da zvonidu, el se ča bilo pokvarilo, el ostarilo, el grum, sačuvaj nas Bože lupil pa sve pokvaril, bilo kako bilo zvona nisu zvonila. I ča ti je crikva brez zvon? I unda se fra Mirko uprl svin snagami da se to popravi. Drž un, drž narod, drž dobre duše iz svita i borme se skupidu novi za popravak. Ni se dalo niš popravit već novo vrć, kako se vrglo uno novo ča zvoni, zvonidu zvona naširoko i nadaleko. A fra Mirko piva: Zvone zvone svetoga Ilije, Sinac mi je selo najmilije.

Lipo od njega, borami je.

M.K.