OTOČAC – E borami se za jutra treba pripravit, ni to samo obična nedilja, ma kakov. Jutra je u Otošcu zbor, Sveta Torica su (tako bi rekal pokojni pop Pezelj, a danaske velimo da Presveto Trojstvo, a to ti jopet dojde na isto). A ča ima veće u kršćanstvu od Presvetoga Trojstva? Ma niš veće, jerbo je to sam Bog u tri Božanske osobe. Toliko smo valjda naučili na veronauku (još dok ga ni u školi ni bilo), nadan se da esmo. I baš je Otočac zapalo da ima Presveto Trojstvo, nekoga sv. Mijovil, nekoga sveti Ante, nekoga sv. Ivan il Stipan, a Otočac baš Presveto Trojstvo. Veliko je to i preveliko, morda ni ne dumamo da je to tako, a valjalo bi, valjalo.
Takojdu jutra u Otočcu bit tri maše, edna u devet uri, edna u edanajst i vičernjica u pol sedam svečera. Vu prvu i zadnju reće otočki plovan Šporčić, a na velikoj maši, e na velikoj maši će bit sva sila popov, kako i prilikuje. Mašu će peljat niki drugi van don Angjelo Kaćunko, a pomagaćedu mu Mile Rajković iz Švice, don Jure Ladišić, Tomislav Sikirić iz Zadra (Stani) i otočki plovan Šporčić.
E sadaj, za ne ki nikako ne moredu doć, bolidu nožurine, nisu baš najbolji u glavi, svisti in se, takovi moredu gljedat na fejsu GlasaGacke, prenašaće se uživo. Ako se dela morebit o starjoj čeljadi, ka ni baš upućena u te tabletiće il mobitelčiće, nek išćedu od nučadi da in to lipo nariktadu, dadu u krilo il vržedu na stol pajdu moć gljedat mašu i sve lipo vidit i čut morda i bolje neg ni u crikvi. Eto.
Imaće se ča čut i vidit, borami oće.
I.B.