Lika nekretnine

Nikako mi iz mačkarov izać, već godinu dan

Objavljeno: 16.02.2021

OTOČAC – Ve godine mačkari nikako stat. Eto i Čiste srede, eto i korizme, al mačkari ne stajedu. A danaske, da je po Božju, bi se spaljivalo mesopusta. Ma kako je krenulo, biće mačkarov i za Uskrs, da nan Bog grije oprosti.

A sve je još lani počelo, nastavilo se na lanjske mačkare. Pa drž pa nedaj, pa ožujak, pa travanj, reko staće. Ma kakov, pa svibanj, unda su zerkicu mačkari popušćali. Aj pomozi Bože, kad u rujnu jopet mačkari, a o listopadu, studenomu i prosincu da ni ne divanimo. Svi u mačkarami. To su mačkari kakove narod ni vidil od postanja svita, cel narod u mačkarami.

E sadaj se vi pitate kako to, ča to, ki to? Lako to. El sav narod vrgal maske na gubičinu? Je. Silon kaj i dobre volje. Najprije dobre volje, a kašnje ga prisililo, ako ne kazna uz guzicu. Pa drljaj pa nosi maske vratru za korist, al reklo da se mora. I ča će jadan narod, red je u mačkare celu godinu dan, evo ma i duglje će to potrajat. I unda velidu da ve godine nema maskenbalov. Kako nema, bora ti doma nema? Duradu maskenbali celu godinu.

Jerbo uno ča je mačkarami glavno je da imadu masku. Drugo ča bilo, ča nebilo. El nosimo maske? Nosimo. Esmo li unda mačkari? Po tome esmo. I ča se unda prnjimo i ljutimo?

I.B.

 

Programi obilaska jezera
SenjskaBura.hr
GlasLike.hr