OTOČAC – Kad krst zame u ruke rvacke novine, more zet u ruke mobitel il tabletić pa malo pogljeda rvacke portale, dojde mu da se man smakne. Da se poništi. Jerbo kad to sve pročita: sve ne valja, sve crno da crnje ne more bit, sadaj je vruće da tako negda ni bilo (pitajte dinosaure, imali bi i uni o tomu ča reć), sadaj nan priti zima kakovu niki ne panti a mi nespremni, pa kad jopet ujesen korona rupi, a već i sad je ima, pa kad poskoči nafta i benzin, a oće, pa kad Rus ispali atom, a samo ča ni, pa ne će bit šenice dost siću Ukrajine (ne bi Ukrajina da je prostrana kaj Rusija), pa ne će bit ulja, pa ne će bit mesa, unda jopet politička stabilnost klimava u svitu, a ni kod nas ni bolja, sve se ljulja, pa jopet kad nas spopane euro … ma ki to sve more i nabrojit. I unda da krst poludil, kako ne će poludit od svega voga? Da ni već munjen bi poludil sa svin svega.
E sadaj da se mi vrnemo nazad, stari narod je rekal da nit je suša izgladnila, nit je moča naranila. Eto, imamo sušu usred leta (tome se kaj puno nji čudi). I već su počele jadikovke: ne će bit krunpira. Morda i ne će, tako je to kad ne pane kiša duglje vrimena. E ča ga i ima, krunpira, malo ga je pod kućicon, svega dva-tri. More bit da je tako. Jopet da ima i noga, el krunpira, kaj se već usmokval (to je za ve mlaje ki ne razumidu dobro – smreškal se). A unda ima i noga ki ima nekve crne fleke po sebi (da ni crna noga?). Nema mu pomoću, krunpiru, gotovo je.
A ča ako pane kiša? Ča unda? Komu una sadaj treba? Jerbo ako pane kiša, a pašće prije il kašnje (eto Gospe i ciganina), da unda more prorašćevat, el krunpir. More, more, ta ni mu prvi put. A ako se cima zazeleni i počme prorašćevat, ča unda? Kosu i u njega, prekosit cimu. A ako bi sad ljuljnula dobra kiša, tekar je početak kolovoza, morda bi u i pomogla, morda bi se i okrupnil. Morda i ni, ki će znat.
I kako god da okreneš – ne valja i kuku.
A lipo je stari narod rekal da nit je suša ogladnila nit je moča naranila. A narod zaboravi te stare istine, nigda mu dost. Naučil kukat.
I.B.