OTOČAC – Ve klimacke promine narod bacile u veliku škrb, kudaj i kamo? Jerbo nikako se uzimit, nikako snižina past, nikako zaladit, a prasci ne moredu čekat. Osobito je to pogodilo Brinjake i Kuterevce, uni man drugi dan po Sivetami nož pod grlo i koljedu, da se uni toga rešidu. I tako su se un toga rešavali nekoliko godin pa bilo mesa usmrđenoga po grmlju i po jamami. Eto ti ga na, jerbo ni vrime za klanje kad pršedu crne muve, van kad zapršedu bele muve. Za ne muve u glavi ne velimo niš!
I ovo zericu ča su se vi dani dogodile klimacke promine, narod odanul, uvatil Bogu zafaljevat na zerkicu studeni i man napal klat. Od prošloga petka do nedilje klalo se naveliko. Sve čuješ kako po selu skvičidu prasci. Je da se negda na petak nigda ni klalo, al sve se prominilo pa i to. Bil takov običaj, sadaj ga se malo ki više drži.
A ni ni bilo loše za klat, prosta noga pa man lakše delat. Samo da kiša ne pada, a padala je, ča više, ča nako roskala. I ni smetala toliko jerbo malo ki više prase opali, svi ga šuridu u banjami. …
E kase krst siti, kako je to negda bilo… Skupi se dost naroda po noj čviki uitro, man se pričesti rakijon, el, studen je, pa ki će u ljibac po prase, a prase ne će van, konda zna da ga nož čeka. Red je poć gazdi il gazdarici svezat štrik oko zadnje noge na zadrg i prase turkat van. Ne će vražja majka van! Unda ga ni izvana ćapidu za uši i izvučedu, pa š njin podase, neki drži za štrik, neki za drugu zadnju nogu, treći sididu na njemu, koljač je kod glave s nožinom kaj sabljon veličkin, tote je i baba Nane s padelon da krv uvati, Mare stoji sa strane s velikon ćupinom u ku će se krv mećat i kadi će je una, nako teplu, rukon brzo mišat da se ne zgrozdi i bacat ne žilice van… Prase skviči – Bože događaja! Ajme lipote!
I kad prase krepa nakon pol ure, unda lipo pet-šest cipanjic na dvorišće, malo dalje od kuće i kotarine, el da se ča ne užge, prase navali na cipanjice, baci koš slame il bujadi na njega i pripali. Vatra gori, pa kad malo obgori muški motikama strži po prasetu i skidaj kočet. Unda ga okreni na drugu stranu, pa jopet tako, samo se moralo pazit da trubuv ne izgori jerbo je i prase najmekše na trbuvu, el. Popucaće koža pa će poć slanina po šteti, a tote je najbolja jerbo je tanja i slaja. Pa još ka rukovet slame da bolje papci obgoridu i unda ji samo dlanon izvrni da ispanedu. Ni tote trebalo nikakovi kuk i kljišć. Samo rukon. Nakon toga pajsanje, ženske krpon peri i teplon vodon poljivaj, mačke se već naštelaj sa strane i čekaj kotilnicu i vitlicu, dica nikako mijura iščekat …
Dalo bi se još toga reć, ma i ovo je previš.
I.B.