OTOČAC – Negda su od kolači bili ušćipci, mlinci, štrudel, bufljini, palačinke, šmarn, štroklje, knedlni, masnica i gotovo. Ma ki je pekal tu orijnjaču, pa makovnjaču, e od česa? Unda su nekako u modu došli keksi na mašinu, al trebalo je imat mašinu, peticu, pa limice kroz ke se testo istiska. A prije toga se testo izriževalo čašon u polumisečiće, a ki je imal limice, mogal je u zvezdice, srcašca i tako. Ma ni se imalo od česa, ni cukru bilo do obisti, a borme ni mašći. Pa ti napravi fini kolači od brašna i vode.
Sada su jopet ušćipci ušli u modu, zovedu da se dojde i na takmičenje u ušćipciman. Navalila baba Marta da gremo na to, daj baba umiri se, al oće i oće. Velin joj da ja ne znan kako se deladu starinjski ušćipci, a una veli da zna. Pa kako, reci? Veli baba Marta da vako: umisi se testo kaj za palačince samo pun gušće. A umisi se od brašna i jaj, i ulje se još mlika. Da bi bili bolji mora se vrć i šćupac soli da ne budedu bljutavi. Kad je testo gotovo, unda se u tavu vrže mašće i zagrije, ne smi bit jako prevruće, bi ušćipke oganj jako ćapil pa bi bili beli kaj opanak. I unda se žlicon i šefarkon ljiva u nu vruću mašću testo. A ono se ražlje po tavi pa bude svakojakoga oblika, repavo. I unda kad porudi na ednoj strani, prevrne se na drugu, zekicu još popeče i š njim van. Dok je još tepal potrusi se zericu cukron. Ako!
I ti negdanji ušćipci, nisu uni bili naduti, ma kakov, uni su bili plosnati jerbo u nji se ni mećal ni kvas, ni germa, ni prašak za pecivo. Niš. Jerbo kakovi bi to bili ušćipci u ke bi se mećal kvas? Nikakovi. Te bi trebalo čekat pol dana da se skisadu, a ni vrimena. A germe negda ni bilo, ma bilo je, al reponja ni imal novac za kupit pa mu i kvas bil dobar da mu kruv ne bude uprosto. I unda su uni morali bit takovi, kaj daska. Kase puidu još tepli, iBože pomozi, a kase oladidu, bili su mekucni kaj treska.
Unda se počelo u ušćipke mećat germa, pa kisat, pa kase skisadu unda žlicon mećat u vruću mast. Al to ni to, to je već nešto drugo. Unda se počelo kisano testo rastezat na daski pa čašon rizat, mećat unutra pekmez i poklapat z drugih teston, to jopet nisu ušćipci, to su unda bufle. A bufle nisu isto ča i starinjski bufljini. Jerbo starinjski bufljini esu od dizanoga testa, u sredinu se metne pekmeza i složi u tepsiju edan do drugoga, i tako spečedu. A bufle se pečedu na masti. I sadaj svi velidu da su sve to ušćipci. Baba Marta ne da ni čut za to, ušćipci su ni prvanji, a ovo kašnje, to je nešto drugo. Borami i je. Morda su vi noviji šmekniji, al nisu ušćipci.
I.B.