OTOČAC – Sve više nekako dolazidu jopet „u modu“ suvi božićni kolači. Edno vrime kolač ni bil kolač ako ni bil od kakove kreme, pa to nisu mogući u ruku zet i kaj krst poist, to propada kroz prste, curi, razbali se, tote ti treba pladanj, pa pinjur, pa činš gubičinu otrit. A suvi kolačići, apiš ga odendanput i gotovo. I još nešto, ti suvi moredu durat sve tamo do vlaškoga Božića, ma i do Fajbanove moredu, a vi ljigavi, pokvari se to, bi te štumak prekinul, bi.
Evo još ednoga recepta za štanjgice. A gre vako (vaj se ne važe, gre na šačice):
3 šalice orijov, edna šalica prezla, edan belanjak, štaub cukra isto noliko koliko i orijov (3 šalice). Brez rakije ne more, curnut rakije toliko da se testo more zamisit, borami da. A more se dodat i ka kap ruma, more, more. I unda kad je testo umišeno, takačicu i razvaljat ga, ni predebelo ni pretanko, nako na meru. Kad je razvaljano, nož u ruke i rizat štanjgice. Kako nema brašna, ne treba peć, vidiš koliko si tote napridan. A more ji se i pomazat, glazura se napravi od belanjca, mrvinju lemuncina i štaub cukra, sve se razmuti i lipo pomaže i ostavi da se prosuši na ledenomu zraku. Eto, i štanjgice gotove.
I.B.