ŠVICA – Bilo je to u rujnu 91., konda je čera bilo, letil avijon njeve JNA i pušćal raketu na švičku crikvu. I pogodil je, npravil škulju i na zidu i na krovu, a u nutri da se ni ne divani. Dobro je ni srdal, crikvu. A unutri, Bože slobodi, kamenja, raskinuti štiketov, komadi rožnikov, prašine, ma i oltare je ča srdalo, ča oštetilo.
I unda je plovan Mila makal uno ča je od oltarov ostalo i vrgal u garažu. A rvacka državica je obnavljala crikvu i lipo je obnovila, popravil se zid, zaminil se krov, zaminil se i toranj crikve, vrgle se nove kamene ploče na pod, stare polovan Mila izdrljal van i popločal ispred crikve, ljutili se ni iz Zavoda za spomenike kulture, da ni smil, a un njimi lipo rekal da jin un ne brani da nove ploče maknedu iz crikve van i vržedu jopet stare. Na tomu je i stalo, bil Mila pametan pop.
Al oltarov ni, crikva brez oltarov, neki vikali da to ni ne treba, da čemu oltari, da se maša nako i nako prominila, da je stol glavni, a ti retabli, eto tako, pa sliku svetoga Ivana obisilo na kljin na zid u svetiščću i da je to to.
Tako je bilo i u Otočcu kad je crikva izgorila, a veliki oltar da se i ne divani, ča izgoril, ča pocrnil. I vikal tadanji biškup Tamarut da oltar treba maknut, da ča to više treba, da je dost sliku Presvetog Trojstva vrć na kljin na zid, al pop Vlado Pezelj je rekal njegovoj preuzvišenosti da će oltara bit ili njega, el Pezelja, ne će bit. I drž – ne daj, borme se Pezelj izboril da se oltar obnovi, doduše vi iz Konzervatorskoga nisu dopušćali da se ofarba već ostal nako bel, al ga je.
Al došali novi popi, a svaka nova metla dobro mete, zauzel se gospodin Kaćunko za švičke oltare, raspital se dokljen je to došlo, borme našli i stare komade oltarov i kako ti oltari, da se Švičani ne ljutidu i ne oštimadu, nisu imali velike umetničke vrednosti, lipo dogovoril s Majstorinon da napravi replike oltarov. A ki će ako Majstorina ne će, ni un samo majstor već – majstorina, to već dost divani. Kako dogovoreno, tako i napravo, prije Vazma Majstorina napravil dva bočna oltara, red jin bilo napravit postolje i na nji montirat oltare (retable).
I kako se oltari vrgli, crikva progljedala, man druga crikva. A crikva brez oltarov je nako pusta, da trnon potegneš, ča bi babe rekle, ne bi imal zač zapet.
Svega toga teško da bi bilo da se Grad ni isprsil i kapnul lovicu.
Al sve ni gotovo, treba domirit i veliki oltar, dela se, a ako Bog da i Majstorina, velidu da će za Ivanju bit postavan. I tako će švička crikva bit kaj nova,konda je četnici nisu si razrdali.
M.K.