Sveta tri kralja u Švici

ŠVICA – Danaske su Sveta tri kralja, Crikva tome viče Bogojavljanje, kako god bilo – velik je to blagdan u Katoličkoj Crikvi. Pok je ve nove rvacke države, to je i državni blagdan, ne dela se (koda se inače dela.).

Mašu je u crikvi sv. Ivana rekal otočki vikar Anđelko Zdeslav Kaćunko. Lipo je prodikal o blagdanu, protumačil ča je to, zač je to važnao svakoj kršćenoj duši, ma puno je toga rekal. Moralo se toga dost uvatit za uši inače badave njegova prodika, el.

Unda je Kaćunko, kako i spada, bacil u kablicu vode sol i blagoslovil vodu. I to narod zove – svićena voda. A svićene vode vajk treba, kad pop gre po kućami, kad koga - nedaj ti Bože zaboli, kase treba blagoslovit marva, i zemlja, kad treba otirat zle oblake i vrime, za svašta svićena voda valja.

Bila edna baba, ne u Švici, ka se dovrgla kako imat svićene vode cele godine. Una lipo ulji svićenu vodu u šternu i imala punu šternu svićene vode, kad oš i koliko oš. Pametna baba. A sadaj, malo ki drži do šterne, a vodovod ne moreš blagoslovit ma da ga sam biškup blagoslivlje.

A unda jopet, edan pop, da mu imena ne spominjemo, un je edanput blagoslovil kišu pa je cel dan padala svićena kiša, a da verni narod to ni ni znal. I užival Božji blagoslov. Svašta se more kase oće. Borami da.

M.K.