Baba Jule bi zelene kafe

OTOČAC – Baba Jule odanula, razvezala rubac i gladi se svoin granbavin rukami po belin peljušami. Bi rekal krst da gradi flizuru, a ne, una je to samo jako zadovoljna. E š čin? – Vidi tebe, kako š čin? – Pa e, š čin si ti to baba zadovoljna? – Esu li prošli izbori za precjednika države? – Esu, i? – Eli vratar pronesal popa po blagoslovu? – Bože mi prosti, je – odgovaramo mi babi kaj u školi. – E pa to ti je to! Još samo da Fajbanovu otporavimo i unda moremo spat. – A! Konda sadaj ne spiš i ne moreš? – Ma mogu, tako se reče. – Unda dobro kase samo reče.

-Kako bi ja kafe – nateže baba Jule noson. – Eno namo ti puna piksa pa kuvaj koliko ti duša oće, i pij dok ti oči ne pobelidu. – Ma lako reć, al ja bi, znaš, ne prave,negdašnje kafe, ne ča miriši ... – Bože slobodi, a konda va iz pikse ne miriši! – Ma da, malko dane po kafi, ali ni to to. – A da ki je sadaj vratar? O, baba, s tobon posla više neg s precjednikon države. – Kasi to spomenul, a oće li se jopet derat na Pepa kad budedu krunili Titu? – E ta ni kralj da ga krunidu. Da Titu!? I ka Pepa, da se tebi ni ča okrenulo, a? – Ma ni, ni, niš mi se ni okrenulo, znaš Pepu ča je pivala Lipu Našu, na ča zavija, Bože mi prosti, kaj vuk kad piva. Ni nalik lisici. – Baba, ajmo se mi ostavit Pepe, i Tite, moremo i u gajbu dospit siću tvoje jezičine, ajmo mi na kafu, kafu ti vrag stukal.

- Da je meni friške kafe. – Friško kuvane? – Ma ne, u zrnu, ne lipe zelene, nako duguljaste. – Baba, ne sanataj, takova se više ne prodaje. – Morda kadi i da, aj se ti raspitaj. ... Da je meni nakove kafe, pa da ja nju metnen u brštulin, pa da otvorin kolo na peći, pa da ja nju lipo opržin na ognju, e to bi bila kafa. Ma zamirišalo bi pol grada. A ne va vaša kafa, konda ciglu samlilo, negda kisela, negda žuka da psu na rep metnut bečal bi, negda te man na nju protira u abort, negda te u žličici siću nje upre. ... Babe su se u starinjsko vrime kafon ličile, borami esu, ja ti velin. Još metni ko zrno kimljena, il metice, a!, to je bila kafa. Pa unutra nadreš cukara, kaj medecina slatko, zubi trnedu, sadaj ne trnedu jerbo ji ni neman, najslaje je bilo žličicon iz dna šalice naj cukar polizat.

- Niš od te tvoje kafe? – E zač ne? – Pa da je i kupimo, nemaš je kadi opržit. – Kako nema? - Pa nemamo šparketa na drva, imaš pol plin a pol ve indukcijske ploče. Aha, ča sadaj veliš? – E, vrag ti odnesal te tvoje ploče, ne znan ji ni upalit ni ugasit, a kamoli kafu skuvat. Dojde mi da pojeden kadi u birtiju na kafu. Eeee, velin da vrag došal na svit. ... Moj pokojni Juka, Bog ga pomiluj, moj pokojni Juka, un je meni brštuline delal. Od kantic. Lipo ja njemu donesi kanticu od česa, un protakni kroza nju debelu žicu, na kraju napravi ručku za okrićat, unda proriži za vratašca i od limice ji napravi i to ti je bilo to. Tako se kafa najbolje pržila ... divani baba o nekoj davnoj kafi i svomu životu, kase živilo brez indukcijski ploč i plina, kad je Bog šećal po zemlji, kad je sve mirišalo, kad je ...

I.B.