Medardo ostavil četrdeset dan lipoga vrimena

OTOČAC – Čera je bila Dova, al je čera bil i Medardo. Nekako nan je Dova veći blagdan pa je pokrla Medarda, a njega se valja vajk sitit. Jerbo kakovo je vrime na Medardu, takovo će bit četrdeset dan. A bilo je lipo i prelipo, ni pala ni kapljica kiše, samo da je pala edna edina, bila bi moča u lipnju i do polovice srpnja. Vako će bit lipo, teplo, da ti duša ima ima izać od vrućine. A mora se, narod mora kosit, a ki je ča i žita bacil, i požet. Sve do Ilinje.

Al treba reć još nešto, eto i dovski kvatar, počimljenu u sredu jutro, a onda se more vrime i poremetit, more past i ka kap kiše. Tako je vajk bilo, za svetoga Antu i svetoga Vida se zelje sadilo pok je svita i vika. Ako nema kiše, sadilo se na vodu, muka je to bila. I još nešto oko dovski kvatar treba reć, svi sveci nosidu kvatre (a četire su u godini) na prsi, samo sveti Duv na leđi. Zato su kvatre vajk nakon Dove.

Eto.

I.B.