Šimunska je nedilja i ni za ribat zelje

OTOČAC – Danaske je sreda, sajmeni je dan. I na placi se prodaje to ča se prodaje, ni nešto, al eto. A tamo pred radijon prodajedu zelje. Ne samo da prodajedu glavice, nego man ti i uribljedu, ne treba se kod kuće mučit, glavice prečistit, križat ji, pa mećat u kućicu i turkat po ribežu. Ma kakov, gospocki sve to danas. Edva i u bačvicu vrć, zericu ga pognjest i naljat vode, vrć dašćicu i kamenčinu. I to puno.

A narod zaboravlja da je va nedilja šimnska nedilja i da se zelje ne smi ribat u toj nedilji jerbo će se u bačvi – okrićat. Tako stari narod veli, da je odvajkad tako. A sveti Šimun bil čera, pa kudajš bliže.

Kad to mlajemu svitu rečeš, un te bljedo gljeda, niš ne razumi, konda mu na grčkome divaniš, i još na kraju reče: pa ča ako će se okrićat? O Bog te u šumu okrenul!, ako se zelje u bačvi uvati okrićat, unda ti to znači da se pokvarilo, da je obagnjilo i da moreš man š njin u pritorak. Unda uni jopet bljedo se zgljedavadu jerbo ne znadu kadi je taj pritorak i tako tome nema kraja.

A Šimunska je nedilja ve cele nedilje, pa ako zelje pojde po vratru i uvati se u bačvi okrićat, to je siću toga. Borami je. Sv. Šimun je kriv.

I.B.