OTOČAC – Jutroske reklo na radiju da kod nas u Gackoj izmirilo -4. Je bilo studeno, ča je je. Sve belo od mraza osvanulo. I tako već nekoliko dani, pa ti sačuvaj voćke od mraza. Ne more se niš napravit. Bilo naroda kaj je na manja stabalca mećal plastične, jutene i kojekakove druge vriće, pokiral, ma da – ne moreš spasit. A mlade čerišnjice bile nako, nako kaj zrno kukuruza, moreš i pokrit čin oš, smrzle se. Gotovo je, ne ćemo i zobat ve godine. Tako je i s jabukami, slivami, sa svin ča je ocvetalo i ča se već bilo zavrglo.
Ma ne samo da je voće dobilo po nosu, eno gljedan u gradu i kostanji obisili lišće. Sve kaj da će otpast, smrzlo se. A cvet na kostanju gotov, i un se smrzal. Tako je to kase rano sve rascveta i kad mrazi uvatidu tuć.
A vi ča o vrimenu dovanidu, velidu da će mrazov još bit, i to ohoho. Pa ti unda sačuvak čagod. Ne moreš da ti je Bog na leđi. A jopet kad se sitimo da je Spasova tekar 29. svibnja, i da doteljen sve mrazi moredu tuć, unda se nema više ča reć. Nek se Božja vrši i gotovo.
I.B.