OTOČAC - Na maloj placi danaske nema česa nema, i od vraga dlak, Bože nan prosti, ima. Svudaj raščepilo rožice, al nisu to ne prave, ma kakov, sve plastične. Timi ne smeta ni rosa, ni mraz, ni sunce. Ima i za svačiji žep, od trist do trista kun, da ti pamet stane. A medato se zamišale i ribe, ima mali ribic, baš nakovi ča naš narod zna na tavi pofrigat, ima i nekvi veliki rib s kima naš narod ne zna ča bi, ima i nekvi nasmijani ribetin, Bože nan prosti, čovik se prepane kad toga vratra vidi na banku, konda krsta povalilo na banak. A takove in i cene, od dvajst do stopedeset kun, borami da. A med ribami cokljurine, svakakove, i lipo upeltene i ne konda in livon rukon gradilo. A i cena in je takova, od sedamdeset do dvistapedeset kun, pa se ti misli. Jopet, domaćina je to. Tote jopet teglnov pekmeza od svačesa, ni nabroit se ne more, lovačke salate, tote ima fažola plavčića, beloga luka, korabe, da prostite i šipka ima. Unda, unda krp na sve fele ke je Bog dal, s resicami, šljingani, sa šljkicami, šareni, beli, ma svakakovi. Samo ča nema zimski kabanic s pelcon oko vrata, toga još ode nema. I od vraga dlak, velin van ja.
I.B.