OTOČAC – Došal vrag na svit pa to ti je! Eno, eno se kosi u grackomu parku, trava do kolena, zujidu ne pile, sve se dimi. A iza nji ostajedu pravi otkosi, ma plasnica na plasnici zelene trave. Ča bi Miza rekla da to njoj dojde u jasla, a? Ne bi znala od sriće kadi je. Pa jopet zečići, kako bi uni veselo stupali kad bi se mogli domanut vakove travice. Ne bi joj ni koze u brk pljuvale, ne bi, ne. A vako, vako sve u kontejner, grijota doboga, s ton salaton od trave pa u kontejner i na smetlišće. I ne samo edan kontejner, ma ima plasnic za celi vlak kontejnerov.
Aaaaa, ča bi stari narod rekal da ga iz groba izvadit pa da vidi? Ma bi se man stmoglavil nazad u jamu, ne bi veroval ča se u vomu naprednomu i modernomu svitu sve dogaja. A negda, negda kravicu na oprtu i pasi po grabami, bentima, jandecima i gmajni. A vidi ti sad nač je svit došal.
I.B.