KONPOLJE – U Konpolju ni Jurjeva kad je Jurjeva, van kad plovan reče. Svemu svitu je Jurjeva bila u prošli pondiljak, a Konpoljčanima će biti jutra, u nedilju. To se don Angjelo dovrgal da mu u pondiljak tako i tako ne bi niki došal na mašu, dobro, bi pet - šest ljudi, a zato se mašu ne isplati držat. Pa se un, el don Angjelo, sitil da to treba vrć u nedilju, nako i nako je redovna maša pa se more i Jurjeva reć.
A unda još je naredil da svakako moradu i prvopričesnici doć, pa jopet da moradu doć roditelj edan i roditelj dva (to sadaj po Istanbulki se tako zovedu mat i ćaća), unda da moradu i ni za bermu doć, i njevi roditelji edan i dva, i eto ti pune crikve. Mudro!
I još don Angjelko veli dajdu se kašnje maše u kvartiru družit, da će namaknut kakovoga pića, a ženske nek po navadi donesedu kolači, a kase tomu još dometne armonika … ihj, biće Jurjeve sve do zore. To ti se zove Jurjeva! Borami da.
M. K.