OTOČAC – Kako je vaj svit sa svin svega pomunjenil, ničemu se ne treba čudit. Ma kakov čudit! Sve se na glavu nastavilo, ča gori, to doli, više čovik ni sigur ni kadi je nebo, el gori ili doli. Ča bi babe rekle, sve se prominilo samo Rič Božja ni! Nisu babe munjene, daleko od toga da une su munjene. I sposobne. Jerbo s eveli da su babe i Vraga iz prosa istirale, unda se zna koliko je uri ki š njimi pačamenta ima.
Evo kaj na voj sliki, je puknula atomska bomba nad Otošcen, ni puknula. Aj ti veruj komu ćeš? Baš se čulo kadi je prasnulo. Eeee, znaj ti sadaj el to sv. Ilija svoin kolima rošta gori u oblacima il je bomba pukla. A učilo nas u školi t. zv. RKB zaštiti, sve po propisu, na gljivu to sliči, da ni Kim Jong Un, kako li mu ime, da ni Trump, jerbo smo rekli da je svit sa svin svega s umi sašal i da se ničemu ne treba čudit. Aj, srićon, ni, oblak je, znadu mu ime i prezime – da kumuloninbus, ma ča god to značilo. Eto, viput smo dobro prošli, a drugi put, Bože sve u tvoje ruke.
M. K.
Foto: M.K.G.