OTOČAC – Danaske je sveti Vid, vajk je to bilo vrime kase zelje sadilo. Ako kiša ni šrkonula u Vidovi, red ga je bilo sadit navodu. Tako negda bilo, a kako sadaj niki zelje ne sadi, pa više ni sveti Vid ni važan.
A taj sveti Vid, njega je vajk narod vezal s vidom, s očima, je da je sveta Lucija specijalistica za oči (drži i na pladnju), a sveti Vid je specijalist za dobar vid. Zato mu se treba molit da narodu sačuva zdrav vid. To se ne odnosi na zdrav vid u politiki, to ne, tamo ni sveti Vid ne more pomoć, nikako.
A taj sveti Vid, njemu se u drugin jezicima veli kako ki, na latinskomu je to Vitus (ako se odbije taj –us, unda ostaje Vit, a to ni daleko od Vid), tako i Englezi kažedu, Talijani i Španjolci mu velidu Vito, Francuzi jopet Guy (to treba čitat Gij), Rusi Vit, a Švabe Veit, ča treba čitat Fajt.
E sadaj edna zanimljivost ča se tiče toga Fajta, ode kod nas u Gackoj je poznato prezime Fajdetić, drugdi ga ima malo kadi. I često se zna postavit pitanje odakljen to prezime? Zna se da su Fajdetići doselili krajen 17. vika u Gacku iz Gorskog kotara i tamo ti krajev, al ča to znači? Odakljen prezime? E pa po svetomu Vidu, odnosno svetomu Fajtu: Fajt – Fajdetić. Eto, odatljen to prezime. Mogli bi ga prevest i na rvacki jezik, bil bi to Vidić, Vidović, Vidaković, sve tako i po redu. Al ni, van Fajdetić, od švapskoga, borami je.
M.K.