OTOČAC - Minula je i Spasova, ve godine je bila dost kasno, a stare babe su vikale da Spasova mora zateć fažol u zemlji. Oće reć da su une, el stare babe, imale svoju metrologiju, jerbo da dok ne pasa Spasova da more bit mraza pa ode mast u propast. Ča si delal – niš, ča si sadil – niš. A tako je nekako ve godine i bilo, pa oće mraz, pa ne će mraz, tote se uspekljala i sveta Sofija, a valjda je sadaj vrime od mraza prošlo, prenda ni i od krupe, vajk more lupit i sve potuć.
A ve srede na placi svega, oš rožic na sve mile mode, oš zelja, kelja, korabe, paradajzelov, paprik, partizanov (to je uno ča izraste veličko i lila farbe je), ma nema česa nema. I ki ča misli zabost, krajnji je cajt. Još kišurina ljuljnula pa zemlju nešto natopila, za posadit je pravo vrime.
A ima i ča za u zube vrć. Došle čerišnje i jagode. Pateka – pateka. Došlo vrime dajdu se čerišnje i jagode na broj prodavat, kaj negda cigari, ako se ki starji toga sićuje. Al jopet, da prosti vaš obraz, stari ljudi su rekli – ni guzici koliko zja van koliko joj se da. I ne mora se sve kroza nju protaknut, borami ne mora.
I.B.