OTOČAC – Kako je negda staromu narodu bilo lipo dok ni bilo radija, televizije, interneta i tako ti čud. Instagrama! Ni blejal u to, van je sve sam promatral i po tomu se ravnal. Osobito o tomu kakovo će vrime bit.
Evo, rećemo, sveti Medardo. Taj sveti Medardo je bil opasan svetac (i danaske je), kako un reče, takovo će leto bit, nikako drugovačije. Jerbo ako na Medardu pane samo tri kapi kiše, biće 40 dan kišovito. A to ti unda dojde pa skoro do svetoga Ilije. Pa ti kosi i spravljaj, pa ti žanji! Taj Medardo je danaske, potrefil se s Telovon, ne da je palo tri kapi, ma ljiva li kiša ljiva.
A bile i kvatre, dovske, prošle, i ostavile ružno vrime. Pa kako une ostavile, jopet babe velidu da će takovo vrime bit do drugi kvatar. A kadi su druge kvatre tekar, u Mijolji, mijoljske kvatre, krajen rujna.
Potrefile se kvatre i Medardo, moča, biće voga ljeta red travu sušit uz peć, nikako drugo. Ali jopet, stare babe su divanile da nit je moča naranila, nit je suša izgladnila, biće nekako. Siguro da će nekako bit, mora bit, jerbo kako će bit ako ne će nekako. Nu!
I.B.