OTOČAC – Bože dragi, ča se negda svačesa ilo, a mi se danaske bacamo kamenjen u Boga i velimo da smo gladni, da nemamo ča poist. Treba nas tuć mokrin peračon po glavi, borami treba. Kako je negda narod bil ubog, to vaj mladi svit ne zna. Kad mu oš i ča ispripovidat, da to njemu gre na živce, ne će ni da sluša i vajk se tuži kako mu se ne dopada ovo, pa ono, na kraju ma ča mu se dopada – morda pečeni anđeli, Bože nan prosti io ne zamiri nan.
Negda je narod il glotnu ranu, eto, tekar toliko da ne umre od gladi. Ma se ljupal kuvan krunpir, a fažol, kuval se skoro svaki dan, ako ne unda svaki drugi. Pa kad dojde leto, nisi se mogal rešit mavunj, pa mavunje na juvu, pa nasuvo, pa na salatu, al mavunja je mavunja, da joj vraga daš ne moreš je popravit. A kiselina, ta je narodu drob poila, još s palenton i Bože pomozi, al za vičeru ist kiseline i kuvanoga krunpira, e za to je već trebalo imat štumak. Jopet kase babe dočepaj čušpajza, na uši je curil van. Te čušpajz od pitome lobode, pa od blitve, morda i od špinata, ma da je od vraga, jopet je čušpajz. I taj negdanji čušpajz bil redak, kaj juva, kadiko pero trave plive u padeli. A eto, nasrči se ne juve od čušpajza, ako je uza to bil okrajak krušca – mede, tote li si.
E pa sadaj reć da se staromu narodu dopadala takova rana, ni. Ni se imalo, Bog ičin muru napunit, da po drobu ne buče. Pa kad bi ki mrnjgal na ilo, baba Roza je man imala spreman odgovar: - Komu ne valja, neg gre k Mileru ranit se.
E pa sadaj ni tako divanila samo baba Roza, divanile su i druge babe po svin selima. Unda, ki je bil taj Miler? Moralo je bit da je to bila nekva dobra gostijonica u gradu, kasu je spominjali, il otel, kadi se dobro ilo, i skupo plaćalo. I borami je, to je bil otel blizu ženske place, tamo su ila samo gospoda ka ni bila uboga u novciman, a reponja, mogal je samo noson natezat kad je prolazil ulicon mimo.
I nestal je taj Miler odavno, kuća preprodana, novi gospodari su se gospodarili, al je još uvik ostala uzrečica naše babe Roze, i drugi bab: - Komu ne valja, nek gre na koštu k Mileru.
I.B.