OTOČAC – Danaske je sveti Lovra, vajk pada na 10. kolovoza. I taj datun lomi leto, od Lovre pa nadalje je kaj leto, a jopet kaj da ni, pa je jesen, pa jopet kaj da ni. I to unda tako podura do Velike Gospe, a znamo ča je ciganin rekal za Gospu, rekal je: - Do Gospe svi vi molite za kišu, a od Gospe ću ja sam. Eto, ni ni trebalo čekat Gospu, već za Oluju je bila oluja, namrgodilo se kaj da i nebo oće poslat nan nekvu poruku da mora bit oluja, i da je morala bit Oluja. Zastudilo, još zerkicu pa će red bit užgat peć, ne će tome tako dugo bit.
A taj Lovra, ostale su dvi uzrečice svezane za njega. Negda je stari narod vikal: - Sveti Lovrenc, svaka voda studenc. A to je tilo reć da je već zaladilo, da se voda oladila, da više ni zašmurat se na pučini il u jarugi.
Jopet su stare žene računale drugovačije vrime od svetoga Lovre, pa su divanile: - Do Lovrenca - pol vretenca, od Lovrenca – celo vretence. To je značilo da više ni za vrime gubit, da je red prest svaki dan ma ča da se prelo jerbo doće i jesen, uvatiće se zime, a ako ni spredeno neće bit ni osnovano, ni navijeno, ni satkano.
Eto tako je nami sveti Lovrenc negda divanil. A danaske, kakovo je vrime, red je i ćurćić sobon zet da krst ne ozebe.
M.K.