OTOČAC – Bože dragi, kako se sve prominilo, kako je sve postalo siću drugoga, kako je sve postalo skupo, al niki ne popušća – ča bi selo reklo. Pa tako i Sisvete. U novo vrime kako se Sisvete primičedu, tako narod zone vatadu, koliko će to koštat. A puno će koštat, te daj gradi spomenike i smići velike novce u kamenje, te kupuj vrpe rožic, te kupuj svić da ji ne bi ni u šajtrogami mogal poturkat. Mora se. A siću koga se mora? Siću pokojni? Ne bi se reklo. Ne siću mrtvi, ma joook, siću živi. Pa jopet babe robice pripravljadu, kefljedu kostime, gredu davat vodenu ondulaciju, farbadu se jerbo je njimi poć na groblje kaj – event. Treba se pokazat, treba se koćit po grobljima, trličat, klafrat, to treba. Tako nan veli naša baba Janjica. A kad una nešto veli, unda tote nema pogovora.
I kad krst metne prst na čelenku i malo bolje produma, ni joj ni edna munjena, borami ni. Sve je nekako ispalo na pokaževanje. A još kako ve godine Sisvete padadu u sredu, već su grobi čera morali bit nakinčani, pa danaske nedilja, doćedu svi izvana, pa unda treba poć i na Sisvete, pa na Mrtvi god, eto, a vajk treba zapalit ku sviću da narod ne bi rekal da je grob prazan, a nikoga ni bilo. A to košta. Gotovo pa da na smenu treba na groblju stražarit.
-Negda, velin negda, dok je Bog sećal po zemlji – veli baba Janjica – ni se toliko rožic teglilo na groblje. Ma kakov! I kadi su rožice bile u vratru? Ako je ka žena u vrtlacu imala ku georginu, nju bi mraz pobral prije Sisvetov. Zato smo pokirale starin klašnjami rožice po noći, đegda bi ji spasile, a ako je mraz bil jaki, ni in bilo spasa. ... A unda bilo je kadi ka lipa kata, bela, celjena ili braumasta. I to ti je to. A ne danaske, ako nisi rožicami grob prekrl, unda te lajedu kako škrtariš na pokojnima, a sve su ti ostavili, namrli... Pa kad projdedu Sisvete, kiša ubije rožice, il rukne mraz, šeći po groblju i nosi te bujadnjake u kontejner. Bacaj gotove novce. Kadi si bil – nigdi, ča si delal – niš. Bolje da si mašu pokojnima platil da pop reče ... – rastumačuje nan baba Janjica kako stvari stuidu.
Da bi besedu na to ki rekal.
I.B.