OTOČAC – Danaske je Sveta Kata, a naša baba Jule veli: - Sveta Kata, snig na vrata. I borme je danaske zerkicu prljil, daje do znanja da je tote. Ni to bil baš pravi snig, ni bila ni tuča, to je bil smrznut snig, u malin baloticami se štrkal po tlu, al je brzo jenjal. Unda naša baba Jule, ma una je puna mudrosti kaj šipak srboguzic: - Sveta Kata zapire pirovska vrata. – A ča to baba znači, a? – To ti, beno moja mudra, znači da počimlje Došašće, a unda pira ni. Eto, to ti to znači! – slavodobitno na veli.
A sadaj ki je ta Sveta Kata. Veli nan baba ovako, a una zna svakoga vratra: - Sveta Kata,el tadaj još ni bila sveta, ma kakov, bila obična cura, una je rojena u nekvoj Alesandriji tamo negdi u Misiru. Bilo to pred nekoliko godin, velidu da 289. godine da je rojena, ja se toga ne sićujen, morda bi se moja baba Marjeta i sitila kase rodila. Da bila iz stojeće kuće, da je znala čitat i pisat, valja išla u pučku školu, borami je. I unda da se gradila pametna i da je peljala divane s mudrin ljudima, da njii bilo pedeset a una sama, i da jin je doklala. A kako se ni tila povinovat poganskin bozima, nekakov car Masencij, tako nekako, da naredil da je vržedu na kolo i da je okrićedu i mučidu. A kako se una ni tila odreć Spasitelja, osikli joj glavu prik prikomice. I unda je brez glave proglasilo sveticon Božjon – poučava nas baba Jule.
A Sveta Kata je zaštitnica fizolofov, advokatov, kolarov i študentov. Kako niš od voga nismo, unda nas ni ne zališuje, el. Al, svedno je se spomenemo, baren po snigu.
I.B.