OTOČAC – Uškopila korona narod više neg ča je mislil da je, a borami je. Kad prolaziš mimo pateke u gradu, narod lipo u redu stui i čeka da ujde unutra, u pateku, ne više od dva krsta. Tako je to negda bilo, pisala i čedula na vratiman, sadaj niš ne piše, maklo tu čedulu, more uć koliko naroda oće, al un, narod, svedno čeka i kroz caklo zaviruje koliko ji je unutri. Pa kad naj prvi izajde, unda naj ki je na redu šmucne u pateku. Tako se vajk brojka drži na dva, narod korona dresirala, borami je.
I unda kaj ta korona jenjala, il je baren više niki ozbiljno ne doživljava, bila-ne bila, al narod edva dočekal da se ča novo pojavi, kakova pošast. I borami se pojavi – magareći kašalj. Spopal narod magareći kašalj, kašlje narod, jezika ne uvlači, ojdu mu oči iskočit od napinjanja, a taj narod brzo maske na nos pa leti brže bolje testirat se da vidi ima li magareći kašalj il nema, veli taj narod – da zna na čemu je. Dobro pitanje, na čemu je narod?
Naša baba Franca kaj nešto kašljuca već duglje vrimena. Obisila joj se i cuca iz nosa, tare una to rukavon, sav se rukav već cakli od cuc. Nikako to nju pasat, pa prži cukar i kuvaj na mliku, pa se šuri s tin, pa kuvaj kapulu i mliko i vrzi meda, pa ga god da pripraviš babi baš ne pomaže. I ne samo da kašlje, van joj iz prs nekve kaj sviralice sviridu, pišći joj. Veli snaja: - A da mi babi popa dopeljemo, nigda se ne zna. Vidi kako se sva usukala, ušla se, da ne bi una šla za batalijonon, a? – Ma da, ne bi nju vratar svojin baton još ubil. Al pitaćemo je. – Baba, bil ti da mi tebi popa dopeljemo, da se spovidaš, da zadnju pomast primiš, morda ti polakša, a? Kad na baba ofrknu svoju šljuku, pogodi me u cipac na nogi, zaboli to kaj vratar, dobro mi nogu ne prebi. – Popa? Un bi meni popa peljal! Kakovoga popa? Ča će meni pop? To ča ja zericu kašljen, to ča iman magareći kašalj, konda san ga edanput u žitku imala, un bi meni popa! Marš smrade, de smrade...
I kako mi njoj spomenušmo popa, baba Franca presta kašljat, nesta magarećega kašlja konda ga nigda ni ni bilo. Eto lika, samo spomeneš popa i kaj rukon odnešeno.
Sadaj, da je naš zdravstveni sustav pametan, kaj ča ni, lipo bi u anbulante vrgal popa, i man bi svi problemi bili rešeni, vako troši novce ...
I.B.