OTOČAC – Danaske je Fajbanova, velik zbor u Otošcu. Skupilo se puno naroda, ocvakudaj je došal, tako je to bilo i u negdanje vrime. Biće da je tome pridonesla i subota, ne dela se, narod ima vrimena, a unda jopet i vrime ni ružno, je da je zerkicu studeno, al prosta noga. Pa narod došal.
Najprvo je bila prošešija od crikve, naprvo barjaci, pa državni, pa gracki, unda crkveni barjaci, pa ulicon ednon pošli, pa drugon sve do crikve prošli. Edva narod stal u crikvu koliko ga se sleglo, puna kora, pune galerije. A popov, došli svi od Vrila do Bila, edva svi stali u svetište, i med njimi biškup šibenski Tomislav Rogić. Svi u lipi crljenima misnicama, kako i spada jerbo su sveti Fabijan i Sebastijan mučenici Katoličke Crikve, a za mučenike se crljeno obuče.
Mašu je peljal biškup Rogić, kako i spada, a bio je i mons.dr. Richard Pavlić, kome je povereno da timuna biškupijon dok biškupa ne najdedu. Neki veli da su ga već i našli, neki da nisu, a ki će znat, tai se. I pivalo se iz srca i duše, sve u slavu Božju i zaštitnikov Gacke svetoga Fabijana i Sebastijana.
I.B.